උසස් පෙළ ප්‍රතිඵල සහ හොරාගේ අම්මගෙන් පේන ඇසීම

Share

ප්‍රතිඵල ඇයිද මෙච්චර කල් පමා                    උනේ

අද දෙනවා හෙට දෙනවා කියල                     අනේ

දෙනවා කියල පැය ගාණක් පමා                   උනේ

දුන් ප්‍රතිඵලත් මේ මොනවද                  අවුලක්නේ

එකෙක් කියයි උඹට වඩා මම                     දක්ෂයි

rank එකෙන් කිව්වානම් ඒක                      සැකයි

ඒ නම් මදැයි තව දේවල් සිද්ධ                     උනයි

කලා කරපු උන් ගණිතෙත් පාස්                   උනයි

කාටත් සැකයි දැන්නම් මේ                     ප්‍රතිඵලය

සැවොම කියයි වරදිලු දිස්ත්‍රික්                      අගය

කාටත් හොරා නැතුවම කිසි                   කලබලය

ජාලෙන් යළිත් මතුවුනි නව                    ප්‍රතිඵලය

දෙවන වරත් දුන් ප්‍රතිඵල නිම                       වුයේ

තව එක් බසක ප්‍රතිඵල නෑ හමු                     වුයේ

පේපර් බලන්නට යැව්වද                       රුසියාවේ

එහෙ කොම්පියුටරෙත් කැඩිලද වගේ අපේ    පායේ

කොහොමද එකතු කලෙ දෙරණින් ප්‍රශ්න      කලා

කැරකුනි කොමා 360 කුත් එකක්                 කලා

පත් අට එකට සිඳ අරගෙන මෙව්වා              කලා

ඇයි වැරදිද මම ඒ දෙක එකතු                     කලා

ප්‍රතිඵල අවුල දැන අප මහ                    රජාණෝ

දැමු කොමිසමේ උප කුලපති               තුමාණෝ

විමසා බලා වූ සැම                          කාරණාවෝ

කොම්පියුටරේ වරදකි කිසි සැකක්               NO

උප කුලපති පත් කළේ සිසු                ඡන්දෙන්ද

ඔහු පත්කළේ ජනපති බව                   දන්නැද්ද

එහෙව් කොමිසමක විනිවිද බව                නැද්ද

ඇහුවේ පේන හොරාගේ                අම්මාගෙන්ද

මට බැරි දේ වයිමට කළ හැකි                   උනිද

එහෙව් මෙමට ගණ දෙවියොත්             කජ්ජක්ද

ප්‍රතිඵල ගැන සිසු පැමිණිලි                   නැගුනාද

කියයි බන්දු මැති සබේ දාගෙන                  සද්ද

කිවත් ඇමති ප්‍රතිඵල හරි                     දැකුම්කලු

මානව හිමිකමේ පෙත්සම් ගොඩ               වේලු

මෙවන් බසට ගැමි වහරේ                     කිව්වාලු

මුව නරි වදන් රෙදි පල්ලෙන්                බේරේලු

ජීවන මීගහගේ

6 කණ්ඩායම - ඉංජිනේරු පීඨය

මවකගේ ඇසින් දකිම්..........

Share

දරුවා මෙලොව එළිය  දුටු දා සිට ම අප තුළ වු ආශාව වුයේ ඔහු/ඇය හොඳ පුරවැසියෙකු මෙන්ම ලොවට වැඩදායි පුද්ගලයෙකු ලෙස රටට භාර කිරීමයි. මෙසේ දරුවන්ගේ අනාගතය සවිමත් කරවීම යන ඒ පරමාර්ථය මුදුන්පත් කරගැනීම උදෙසා අපි බොහෝ වෙර දැරුවෙමු. විටෙක අපි අපේ නොයෙකුත් ආසාවන් ඒ වෙනුවෙන් යටපත් කරගත්තෙමු. තම දරුවෙකු විශ්වවිද්‍යාලය කරා යවන ඒ මාර්ගය එළිපෙහෙළි කිරීමට දෙමව්පියෝ විටෙක තම තරාතිරම ඇති හැකිකම ද අමතක කොට මහා ධනයක් වියදම් කරති. අතමිට සරු උසස් පැලන්තියේ අය හට මෙම වියදම එතරම් අපහසු නොවෙතත් විශ්වවිද්‍යාලයට ඇතුළත් වීමට සුදුසුකම් ලබා එහි ඉගෙනීමට යන දරුවන්ගේ දෙමව්පියන් බහුතරයක් ම විටෙක තමන්ට නොරුස්සනා තරමට දරුවන් වෙනුවෙන් වියදම් කරනා  මධ්‍යම පාන්තිකයෝ වෙති. කෙසේ වුවද මොවුන් සියල්ලෝම අසීමිත කැපවීම් කෙරුවෝ වෙති. එපමණක් නොව අධ්‍යාපනය හොඳින් හදාරා විශ්වවිද්‍යාලයට ඇතුළත් වන මාර්ගයේදී දෙමව්පියන්ට මෙම බරපැන උසුලනවාට අමතරව, දරුවන්ගේ සෙවනැල්ල වී නිරතුරුව ඔවුන් ගැන අවදියෙන් සිටීමට ද සිදුවේ. දෙමව්පියන්ගේ පමණක් නොව දරුවාගේද තිර අධිෂ්ඨානය මෙයට අත්‍යවශ්‍යම සාධකයකි. විශ්වවිද්‍යාලයට යන මේ අතලොස්සට ඇතුළත් වීමට ශිෂ්‍යයෝ ද දිවා රාත්‍රී නොබලා තම අධ්‍යන කටයුතු වල යෙදී මහා විශාල තරගයකට මුහුණ දෙති.

තම බලාපොරොත්තු මුදුන් පත් වී විශ්වවිද්‍යාලයට දරුවා ඇතුලු වන දිනයේ දී ඔවුහු ඉමහත් ප්‍රීතියෙන් රජවරු වෙති. දෙපාර්ශවයේම මහත් කැපවීමෙන් විශ්වවිද්‍යාලයට තේරී පත් වෙන දරුවා නියමිත කාල සීමාව තුළ තම උපාධියේ වැඩ කටයුතු හොදින් නිමකොට ගෞරවනීය පුද්ගලයෙකු ලෙස සමාජයට අවතීර්ණ වනු දැකීමට දෙපාර්ශවයම සිහින මවති. එහෙත් කුණාටුවක් සේ මේ ඇති වූ හදිසි තත්වය නිසා දෙමවුපියන් හා දරුවන් යන මේ දෙපිරිසම දරුණු මානසික පසුබෑමකට ලක්ව ඈත. විශ්වවිද්‍යාලයෙ ඉගැන්වීම් කටයුතු ඇණ හිටීමත් සමගම දරුවනට නිකරුණේ කල් මැරීමට සිදුව ඈත. මෙය ඉතා භයානක තත්වයක් මෙන් ම අනිසි ප්‍රශ්න බොහෝමයකට මුල පිරීමකි.

30 වසරක යුද්ධය නිමා කොට රට ආශ්චර්යක් කරා ගෙන යනවායි පවසන රජය දරුවන්ගේ හා දෙමවුපියන්ගේ ජීවිත පිළිබද කීසිදු වගකීමක් හෝ සැළකිල්ලක් නොදක්වා මෙම ප්‍රශ්නය හෑල්ලුවට ලක්කර ඇත්තේ මන්දැයි පුදුම සහගතය.

අපි තාමත් උසස් පෙළ

Share

                                     

                    “උසස් පෙළ පන්තිය කියන්නේ ජීවිතේ turning point එක“ බව සදහන් කරමින් තමයි උසස් පෙළ ගුරුවරුන් පාඩම් පටන් ගන්නේ. මේ කතාවේ බරපතලකම තේරුම් ගත්තු, ජීවිතේ වගකීම් ගැන හිතපු අය විභාගය සමත් වෙන්න වෙහෙස වුණේ කරන්න පුලුවන් හැම කැපකිරීමක්ම කරමින්. උසස් පෙළ පන්තියේ හිටපු අවුරුදු 2 ½ පුරාවටම පාන්දර 2-3 වෙනකම් නිදි මරාගෙන පාඩම් කරපු ඒ අයට තමන්ගේ නෑදෑ හිතමිතුරන් ගැනවත් අඩුම තරමේ තමන් ගැනවත් සැලකිල්ලක් නොදක්වා වැඩ කරන්න සිදු වුණේ සමාජශීලීත්වය ශූන්‍යත්වයට පත් කරගෙනයි. ඒ කෙසේ වුවත් උසස් පෙළ පන්තියේ ගුරුවරුන් සුරපුරයක් ලෙසින් පෙන්වා දුන් සරසවි සිහිනය සැබෑ කර ගන්න ඒ සිසුන් කරපු කැපවීම හැම කෙනෙක්ම කරන්නේ නෑ, හැම කෙනෙක්ටම කරන්නත් බෑ. තමන් දරපු වෙහෙසට සරිලන ප්‍රතිඵල ලබමින් සරසවි වරම් ලබන්න පුළුවන් උනෙ ටික දෙනාටයි.ඒ අතර අවශ්‍ය සුදුසුකම් සපුරා නැති අනෙක් අය එම බලාපොරොත්තුව අත්හැර දමා පුද්ගලික උපාධි පාඨමාලා හා වෙනත් විකල්ප වෙත යොමුවෙද්දි තවත් කොටසක් රටටත් සමාජයටත් බරක් බවට පත් වෙමින් ඉතුරු වෙනවා.

         පසුගිය ජුලි මාසය වනවිට 2009 අවුරුද්දෙ උසස් පෙළ විභාගයෙන් සුදුසුකම් ලැබූ ලංකාවේ දක්ෂතමයින් කණ්ඩායම විශ්වවිද්‍යාල සිසුන් බවට පත් වී වසරක් ගත වී අවසන්. රාජ්‍ය විශ්වවිද්‍යාල වල ඉංජිනේරු පීඨ වල ඉගනුම ලබන සිසුන්ගේ තත්වය පවතින්නේ ඉතාම සෝචනීය මට්ටමක. පළමු වසර අවසන් වන විට නියමිත කාල සටහන් අනුව සමාසික (semester) 2ක් අවසන් වී තම විෂය ක්ෂේත්‍රය පිළිබද සිසුන් තුළ පැහැදිලි දැනුමක් වර්ධනය වී තිබිය යුතුයි. සම්මතය එසේ වුවත් රාජ්‍ය අවධානය කිසිදු ලෙසකින්වත් යොමු නොවූ සරසවි ආචාර්යවරුන්ගේ වෘත්තීය ක්‍රියාමාර්ගය ප්‍රමුඛව සරසවි පද්ධතිය තුළ උද්ගතව ඇති ගැටලු රැසක් හේතුවෙන් පළමු වසරේ ඉංජිනේරු ශිෂ්‍යයෙකුගේ  දැනුම අදටත් පවතින්නේ උසස් පෙළදී නැවතුනු තැනමයි. තම කෙටි ජීවිත කාලයෙන් වසරක කාලයක් නිරපරාදේ නාස්ති කර ගැනීමට සිහිනෙකින්වත් නොපැතූ, මහත් කැප කිරීම් මතින් උසස් පෙළ සමත් වූ ඉංජිනේරු ශිෂ්‍යයෙකුගේ හා උසස් පෙළදී අධ්‍යාපනය කඩාකප්පල් කරගෙන ජීවිතය කාලකණ්ණි කර ගත් පුද්ගලයෙකුගේත් ජීවිතවල වෙනසක් නොමැති තත්වයට පත් වීම වගකිව යුත්තන්ගේ අවධානය‍ට යොමු නොවීම පිළිකුල් සහගත කරුණක්.

                වර්තමානයේද ක්‍රියාත්මක පුද්ගලික විශ්වවිද්‍යාල වලින් පිට වන උපාධිධාරීන් මෙරට තුළ පවතින සීමිත රැකියා වෙළදපොළ ගිලගන්නා විට, බලධාරීන්ගේම වැරදි ක්‍රියාමාර්ග හේතුවෙන් උපාධිය ලබා ගැනීමට මාස ගණනක් ප්‍රමාදව දේශීය විශ්වවිද්‍යාල වලින් පිට වන උපාධිධාරීන්ගේ ජීවිත වල වගකීම භාර ගන්නේ කවුරුන්ද? මෙම ගැටළුවේ බරපතලකම තවමත් වගකිව යුත්තන්ගේ ඇගට නොදැනීම හේතුවෙන්දෝ, ඔවුන් අත්තනෝමතික ජනප්‍රිය තීන්දු හරහා ප්‍රශ්න යට ගැසීමට යෑමෙන් මුළුමහත් විශ්වවිද්‍යාල පද්ධතියටම සිදු වන්නේ අනර්ථයක්ම පමණි. මෙරට විශ්වවිද්‍යාල ජාත්‍යන්තර ශ්‍රේණිගත කිරීම් වලට ඇතුළත් වීමට ඇති ප්‍රධාන බාධකය කහ පාට, කළු පාට කෙල්ලන් හා කොල්ලන් නොසිටීම නොව දේශීය වශයෙන් පර්යේෂණ නොකිරීම හා විදේශීය බුද්ධිමතුන්ගේ සේවය ලබා නොගැනීම බව නොවැටහෙන පුද්ගලයෙකු ශ්‍රී ලංකාවේ උසස් අධ්‍යාපන ඇමති පදවිය හෙබවීම ජාතියේම අවාසනාව නොවේද? 

              -කාලකන්නි මං-