Sunday, December 18, 2011

අපි කොයිබටද ?


මම ඔබෙන් ටිකක් බැරෑරුම් ප්‍රශ්නයක් අහන්නද? “ ඔබ ඔබගැන තෘප්තිමත්ද ?”  ඔබට විවිධාකාර පිළිතුරු තියෙන්න පුළුවන්. ඔබ සමවයසේ තරුණ ප්‍රජාව සමඟ සංසන්දනය කරද්දී ඔබ තෘප්තිමත්ද කියා මම ඇසුවොත් අනිවාර්යෙන්ම ඔබේ පිළිතුර “ඕව්” කියා මම විස්වාස කරනවා. මෙලෙස පිළිතුරු දීමට ඔබට මට අතිශය සාධාරණ හේතු තියනවා. නිදහස් අධ්‍යාපනය ලබාගෙන ඒ හරහා එයටද වටිනාකමක් ලෙබෙන සේ හොඳින් ඉගෙනගෙන රටේ පිළිගත් සෑම විභාගයක්ම ඉහලින්ම සමත් වී, කැපකිරීම්, දහදිය මහන්සියෙන්, කුසගින්න ඇඳුම් පැළඳුම් ගැන නොසිතා, වතුර උගුරකින් කුස පුරවාගෙන නොවිඳිනා දුක් විඳලා, ගණිත අංශයෙන් ඉහලින්ම සමත්වෙලා, ඔබගේත් මගෙත් සිහිනයක්ව තිබූ මොරටුව විශ්වවිද්‍යාලයේ ඉංජිනේරු පිඨයටඇතුල් වී, තම දුප්පත් අම්මට තාත්තාට ආඩම්බරයක්, ඔවුන් හෙලූ දහඩියට වටිනාකමක් ලබාදෙන්නට සමත් වූ දුවෙක් පුතෙක් වශයෙන් ඔබ ඔබගෙන අතිශය තෘප්තිමත් ඇති. සමාජයේ ඉහලම පිළිගැනීමක් ඇති ඉංජිනේරු වෘත්තියට තව වසර කිහිපයකින් පියනගන මාවතට අවතීර්ණවී ඇති නිසා ඔබට ස්වයං අභිමානයක් ඇතුවාට නිසැකයි.

නමුත් මිතුරනේ අප මදක් ගැඹුරට සිතා බලමුද? ඇත්තටම අපිට අපි ගැන තෘප්තිමත් වීමට පුලුවන්ද? ඉංජිනේරු  පිඨ ශිෂ්‍යයන් ලෙස ඔබ තෘප්තිමත්ද? අපට සැබෙවින්ම අපගැන ආඩම්බර වීමට පුලුවන්ද? ගණිත විෂය හදාරන සිසුන් විදිහට අපි හොඳින්ම දන්නවා ගණිත ගැටළුවක් විසඳාගැනීමට අපට කෙලසින්වත් එකම ක්‍රමයකට සිතීමෙන් හෝ කටපාඩම් කිරීමෙන් කල නොහැකිබව. ගණිත ගැටළුවක් විසඳීමේ සාර්ථක ක්‍රමවේදය වන්නේ අප දන්නා දත්ත ඇසුරෙන්, තාර්කික චින්තනය ඔස්සේ එය ලිහිල් කරගන්නා නිවැරදි මාර්ගය තීරණය කර ඒ ඔස්සේ ගොස් ක්‍රමවත්ව නිවැරදි පිළිතුර කරා ලඟාවීම. නමුත් ප්‍රායෝගිකව ඔබ,මම තාර්කික විශලේෂණය ඉංජිනේරු සිසුවෙකු ලෙස එදිනෙදා ජීවිතයේදී යොදාගන්නවද? ඒ වෙනුවට අප පුරුදු වී සිටින්නේ ඉතා පටු, මුග්ධ, අතාත්වික, පදනමක් නොමැති රාමුවලට කොටුවී හර්දසාක්ෂියක් නැති කුහක ආකල්පවල සිරකරුවන් වී , අග්‍රගන්‍ය වෘතියකට මග පෙන්වාදෙන තොතන්නකට පැමිණි ළදරුවන් සේ හැසිරෙමින්, තම තත්වය තම ක්‍රියාකාලපයන්ම බාල්දු වන අන්දමට හැසිරෙන, කොදෙව් මානසිකත්වයකින් ඇලී ගැලී ගිය සිසුවෙකුගේ භූමිකාව රඟදැක්වීම නොවේද? ඔබට ඔබේ ක්‍රියාකලාපය අනුමත කළහැකිද? කෙතරම් කේදනියද?

අප මදකට අපගේ මානය පැත්තකින් තබා ස්වයං විවේචනයේ යෙදෙමු. එදිනෙදා අප ජීවිතය ගෙවී යන ආකාරය මෙනෙහි කරමු. නවාතැනේ සිට සරසවියට පැමිණ, දේශනවලට සහභාගිවී සරසවියෙන් පිටව නවාතැනට ගොස් අධ්‍යයන කටයුතුවල යෙදීමට කම්මැලි සිතුනවිට  Facebook log වී  chat කරන සරල සිසුවකුගේ චරිතයකට පණ පොවන ඔබගේ සමාජීය ජීවිතය පිලිබඳ ඔබ තෘප්තිමත්ද? එසේත් නැතිනම් සරසවියට කැළලක් වනලෙස, අන්මත වලට ගරුකිරීමට නොදන්නා, නොමේරු,  ප්‍රාථමික ආකල්පමත මනස ක්‍රියාකාරකම් හසුරවන කලහකාරී චරිතයක් බවට පත්වී, අප රටේ බුද්ධිමත්ම සිසු කොට්ටාෂයන් සමාජයට ඉටුවිය යුතු වගකීම් යුතුකම් ඉෂ්ටකිරීමට හැකිවන්නේ කෙසේද ? අප බුද්ධිමත්බව අපට අන්අයට පෙන්වීමට හැක්කේ විභාග සහතිකපත්‍ර හරහා පමණක්නම් අප සතු බුද්ධිමත් බවේ හරය කුමක්ද?

සමාජය අද සරසවි සිසුවා නිර්වචනය කරන ආකාරය අපි දැන් විමසා බලමු. මහජනතාවට සරසවි සිසුවා රටට බරක් වූ කාලකන්නියෙකි, මුරණ්ඩු බේබද්දෙකි, සුළු දෙයටත් රන්ඩුවේ පැටලෙන කලහකාරයෙකි, දේශපාලන පක්ෂයකට කඩේයන රුකඩයකි. මිතුරනි, අවාසනාවකට ඔබත් මමත් ඒ කුලකයේ උපකුලකයක් වීමු. ඔබත් මමත් අනෙක් සරසවිවල සිසුන්ට වඩා මදක් වෙනස් වුවද ඒ වෙනස්කම අපව නව කුලකයකට ඔසවා තැබීමට තරම් ප්‍රමාණවත් නැත. රටේ ජාතික පුවත්පත්වල සරසවි සිසුන්ගේ අදහස් මහජනතාවට ගෙනයාමට ඉඩකඩ වෙන්කර ඇති නමුත් ඉංජිනේරු සිසුන්ගේ ලිපි කෙදිනක හෝ ඔබ දැක තිබේද? අප තවමත් පෝස්ටරයක අකුරු ඉරූ පමණින් රණ්ඩුවට පැටලී ඒ හරහා සරසවිය මාස ගණනක් වසා තබාගේනිමට තරම් දුරදිග නොබලා කටයුතු සිසුන් පිරිසක් නොවේද? පුද්ගලික තාක්ෂණ ආයතනවල සිසුන් එලෙස ගැටුම් ඇතිකරගන්නවා යැයි ඔබ අසා තිබේද? අපගේ ක්‍රියාකාරකම් මගින් සමාජයට ඉංජිනේරු වෘත්තීය පිලිබඳ යහපත් ආකල්පයක් ඇති වේද?විචාර බුද්ධියෙන් විමසා බලමු.

ඉතා විශාල ධාරිතාවක් සහිත අධ්‍යන කටයුතුවල යෙදී සිටින අපට  අද රටේ තත්වය පිලිබඳ අවධානය යොමු කිරීමට ඇත්තේ අල්ප කාලයක් බව පිළිගත හැකිමුත්, එසේ රටේ වර්තමාන හැසිරීම තේරුම් නොගෙන, ඒ හැසිරීමට සරිලන පරිදි ප්‍රතිචාර නොදක්වා තම අධ්‍යන කටයුතුවල පමණක් ඇලී ගැලී සිටීම පමණක් කලහොත්, තම අධ්‍යයන කටයුතු අවසන් වූ කල තමන් ලබාගත් දැනුමට සරිලන සමාජීය පිළිගැනීමක් ඔබට නොලැබෙන වටපිටාවක් රටේ පැවතුනහොත් එහි වගකීම ඔබ පිටද පැටවෙන බව සිහියේ තබාගන්න.

අද ශ්‍රීලංකාවේ අධ්‍යාපන අංශයේ නව ප්‍රවණතා පිලිබඳ ඔබ දැනුවත්ද? මෙතෙක් පවතී නිදහස් අධ්‍යාපන රටාව විවිධාකාර වෙනස්වීම්වලට බඳුන්වෙමින් සංක්‍රාන්ති සමයක පසුවන බව ඔබ දන්නවාද? එහි අවසන් ප්‍රථිඵල යහපත්ද අයහපත්ද? එම ප්‍රථිඵල අපට, අප බාල පරම්පරාවට බලපාන අන්දම පිළිබඳව විග්‍රහයක් ඔබ තුල පවතීද? පාලකයන් අරඹන නව අධ්‍යාපන ව්‍යාපෘති හරහා රටට අනාගතයේ ලැබෙන්නේ ප්‍රාග්ධන ලාභයක්ද? බුද්ධිමය ලාභයක්ද යන්න සිත බැලීමට ඔබ ඔබේ තාර්කික මනස භාවිත කර තිබේද? මේ නව ප්‍රවණතා පිලිබඳ ඔබේ විග්‍රහය සුභවාදීද?

රාජ්‍ය යාන්ත්‍රණයේ ඉහළම තැන සිට පහල දක්වා පරිපාලනයේ අද ක්‍රියාකාරකම්වල අවංක අභිලාශය රටේ දූ දරුවන්ගේ අනාගත අභිවෘධිය උදෙසාම පමණක් යැයි සිතීමට තරම් අපි අවිචරශිලී නොවෙමු. හුදෙක් ඔවුන්ගේ සුඛ විහරණයට පමණක් ඔවුන් කටයුතු කරනබව මම ප්‍රකාශ කළහොත් ඔබත් ඊට අඩු වැඩි වශයෙන් එකඟ වනබව ප්‍රත්‍යක්ෂය. අප ඔවුන්ගේ අදුරදර්ශී ක්‍රියාමාර්ග හමුවේ මුනිවත රැකීම මගින් රටට ගම්‍ය වන්නේ අපද ඔවුන්ගේ ප්‍රතිපත්ති සංශෝදනයකින් තොරව අනුමත කරන බව නොවේද? රටේ මහජනතාව බුද්ධිමත් සිසුන් ලෙස අපගේ ප්‍රතිචාරය පිලිබඳ බලාසිටින බව අපි දනිමු. එසේනම් මෙම ප්‍රවණතා පිලිබඳ අප ශිෂ්‍ය ප්‍රජාව තුල කතිකාවතක් අරඹා ඒ හරහා බුද්ධිමත් ලෙස වර්තමාන ප්‍රවණතා විශ්ලේෂණය කොට අපගේ පොදු මතයක් ගොඩනගා ඒ මතය ඔස්සේ එම ක්‍රියාමාර්ග අනුමත කිරීම,  අඩුපාඩු පෙන්වාදීම හෝ විරුද්ධ වීම අප විසින් කලයුතු නොවේද? මෙලෙස සක්‍රියව ශිෂ්‍යයන් ලෙස බුද්ධිමත්ව සමාජයට, පාලකයන්ට ප්‍රතිචාර දැක්වීම මගින් අන් සරසවිවල සිසුන්ටද ආදර්ශයක් වන ලෙස කටයුතු කිරීමට අප යොමුවන්නේ කවදාද?

අප අක්‍රියව සිටීමේ ප්‍රථිඵලය වන්නේ නොබෝ කාලයකින් ඔබේ බාල සොහොයුරා සොයුරිය ඉතා දුක් ගැහට වින්ද උසස්පෙළ විභාගය ඉහලින්ම සමත් වී ඉංජිනේරු පීඨයට ඇතුලු වී අධ්‍යයන කටයුතුවල යෙදෙද්දී ඊට  යාබද අසුනේ සාමාන්‍යපෙළ විභාගයවත් හොඳින් සමත් නැති ඉංජිනේරු පීඨයට ඇතුල්වීමට ඇති අවම හා එකම සුදුසුකම ලෙස ධනවත් දෙමාපියන් දෙපළකගේ දරුවෙක් වීම පමණක් සලකා බලන ලද සිසුවෙකු වාඩිවී අධ්‍යයන කටයුතු වල යෙදෙන දිනයක් නොපවතී යයි ඔබට සහතික කර කිව හැකිද? වර්තමාන සමාජයේ දුප්පත් දෙමාපියන් කීදෙනෙක් තම දරුවන්ගේ අනාගතය පිළිබඳව මෙනෙහි කරමින් සුසුම් හෙළනවා ඇතිද? දුප්පත් පාසල් සිසුන් තම අනාගතය ගැන අඳුරු සිහින දකිනවා ඇතිද? ඔවුන්ට කලහැක්කේ සුසුම් හෙලීම පමණක් වුවද, එම අඳුරු සිහින මැකී යනලෙස සරසවි සිසුන් වශයෙන් අප යමක කල යුත්තේ අප සතුව සංවිධානාත්මක බුද්ධිමය පිරිස් ශක්තියක් හා හැකියාවක් ඇති බැවිණි. උසස් අධ්‍යාපන අමාත්‍යංශ ලේකම්තුමා පවසන පරිදි තව නොබෝ දිනකින් රාජ්‍ය විශ්වවිද්‍යාලවල උපාධි පාඨමාලා රටේ ඕනෑම සිසුවෙකුට මුදල් ගෙවා ලියාපදිංචි වී සංපූර්ණ කල හැකිය. එම සංශෝධන නිතිප්‍රකාරව ස්ථාපිත කල පසු ඊට විරුද්ධ වීමට නොසිට එම ප්‍රකාශයේ බරපතලකම තේරුම් ගෙන ඒ සඳහා දැන්  සිටම ක්‍රියාමාර්ගවලට යොමුනොවුනහොත් අප රටේ දුප්පත් සොයුරු සොයුරියන්ගේ අනාගතය වළලන මිනිපෙට්ටියට අපද ඇණයක් ගස සම්මාදම් වුවා නොවේද? මෙම කරුණු කි පමණින් විස්වාස කිරීම හෝ ප්‍රතික්ෂේප කිරීම සිදුනොකර තාර්කිකව විශ්ලේෂණය කොට තීරණයකට පැමිණෙන ලෙස ඔබෙන් ඉල්ලා සිටින්නේ මගේ දෘෂ්ටි කෝණයට අනුව මෙය බැරෑරුම් තත්වයක් ලෙස මට හැඟෙන බැවිණි.

අප පිඨවල ආචාර්යවරුන්ගේ තත්වයද අපගේ තත්වයට නොදෙවෙනිය. ඔවුන් මහාචාර්ය ආචාර්යවරුන් බවට පත්වන්නේ ගුත්තිලයේ කවි කටපාඩම් කිරීමෙන් නොව තම මනස බුද්ධිය කැපකොට දරනලද විශාල පරිශ්‍රමයක ප්‍රථිඵලයක් වශයෙනි. ඔවුන්ට‍ තම බුද්ධි මට්ටමට සරිලන තත්වයක් ලබාදීමට ආණ්ඩුව සමත්ව තිබේද? පුද්ගලික විශ්වවිද්‍යාල ස්ථාපිත කිරීමට අනුග්‍රහය දැක්වීමට පෙර ඒවා සමග තරංග කල හැකි මට්ටමට අප විශ්වවිද්‍යාලවල භෞතික හා මානව සම්පත් සංවර්ධනයකොට රටේ අවශ්‍යතා වලට ගැලපෙන අන්දමින් පාඨමාලා වෙනස්කිරීම සිදු නොකර පුද්ගලික විශ්වවිද්‍යාල ඇරඹීමට ආණ්ඩුව කටයුතු කිරීමෙන් අපට ඇතිවන්නේ ප්‍රතිලාභයක්ද යන ගැටලුව ඔබට පැන නොනගිද? අප විශ්ව විද්‍යාලය දියුණු මට්ටමට ගෙන ඉන්පසු පෞද්ගලික විශ්වවිද්‍යාල ඇතිකිරීම යම්තාක් සාධනීය දෙයක් වුවද ආණ්ඩුව කටයුතු කරන්නේ ඊට හාත්පසින්ම වෙනස් න්‍යාය පත්‍රයකට අනුව බව පෙනී යයි.

අශ්වයා ගිය පසු ඉස්තාලය වැසීමෙන් පලක් නැත. මෙමෙ අවස්ථාවේ අපගේ බුද්ධිමත්භාවය, මුහුකුරා ගිය ස්වභාවය භාවිත කර ප්‍රායෝගික තලයේ ක්‍රියාමාර්ගවලට අවතීර්ණ වීම හරහා අපට අප රටට‍ හා අප අනාගත පරම්පරාවට මහඟු සේවයක් කල හැක. සුරක්ෂිත නිදහස් අධ්‍යාපනයක්‌ යටතේ, නිසි අධ්‍යාපනයක්‌, තම අධ්‍යාපන මට්ටමට ගරු කරන රටක සමාජයක් තුලදී ලබාගැනීමට අප අනාගත පරම්පරාවට හැකි වන දිනයේ, එම සුරක්ෂිත වටාපිටාව එකල ඇතිකිරීමට මුල් වුවන් ලෙස අපට මහත් අභිමානයෙන් කතාකිරීමට හැකිවනු ඇත. ඉංජිනේරු ශිෂ්‍යයන් මුල් වී එම වටපිටාව සකසා දීම පිළිබඳව එම සිසුන් හා දෙමව්පියන් අපට ගෞවරවය පුදකර සිටිනු ඇත. ඒ සමගම අද සමාජයේ අප පිලිබඳ ඇති අඳුරු චිත්‍රය උඩු යටිකුරු කර මනා දැක්මක් ඇති, රටට සමාජයට ඇල්මක් ඇති, අභිමානවත් පෞර්ෂයකින් හෙබි,  ප්‍රබුද්ධ, රටේ අධ්‍යාපන ප්‍රතිපත්ති සම්පාදනයේදී ධනාත්මක බලපෑමක් එල්ල කරන,වැදගත් ශිෂ්‍ය කොට්ටාසයක් ලෙස හා උසස් තාක්ෂණ දැනුමෙන් සන්නද්ධ ඉංජිනේරු ශිෂ්‍යයන් බවට පත්වීමට මෙම අවස්ථාවේ ක්‍රියාකිරීම අප සැමගේ යුතුකම බව සිහියට නගා ගනිමු.

මෙලෙස අපගේ අඩුපාඩු සදාගනිමින් අප චරිතය වඩාත් නිවැරදි මාර්ගයකට ගන්නා අතරතුර, අපගේ නිදහස් අධ්‍යාපනය සඳහා බදු මුදල් ගෙවන රටේ ජනතාව වෙත අපගේ ප්‍රතිඋපකාරය දැක්වීමට මේ සුදුසුම කාලයයි. උගත් සිසු පිරිසක් වශයෙන් රට තුල තම උගත්කම අගයන සමාජයක් බිහිකර ගැනීමට අපට නොහැකිනම් අපගේ උගත්කමේ ඵලයක්‌ නොමැත. අපගේ අඩුපාඩු පිලිබඳ ස්වයං විවේචනයක යෙදෙමින් සැවොම එක්වී නව කතිකාවතක් ගොඩනැගීමට කාලයයි මේ...

1 comment:

  1. මචන් උඹ කියල තියන දේ නං සහතික ඇත්ත.වෙන කැම්පස් වල කොල්ලෝ ප්‍රයිවට් කැම්පස් නවත්වන්න ගොඩක් දේවල් කරනවා.නමුත් අපේ කම්පුස් එකේ උන් මොනාද ඕකට කලේ.ඒ හින්ද මේ වගේ කතිකාවතක් පටන් ගන්න එක නං නියමයි මචන්.පුලුවන්නං තවත් මේ වගේ දේවල් ලියමු අපි හැමෝම එකතුවෙලා.ඒ මොකද කියනවනම් අපිත් මේ ඉගෙන ගන්නේ කැම්පස් එකක.ඉස්කෝලෙක නෙවේ.

    ReplyDelete