බාහිරට පෙනෙන්නට තිබූයේ ගුරුවරුන්ගේ වැටුප් වැඩි නොවීමේ ගැටළුව අරභයා මොරටු සිසුන් කළ ක්‍රියාකාරකම් කිහිපයකි. සමහරෙක් එය අධ්‍යාපන ඇමති තුමාට විරුද්ධව ක්‍රියාවට නැංවූවක් ලෙස හුවා දැක්වීමටත් උත්සුක වූහ. විශ්ව විද්‍යාලයීය ඉංජිනේරු පීඨයේ සිසුන් ලෙස නිදහස් අධ්‍යාපනයට වැට බැඳීමට සැරසෙන වැඩපිළිවෙළවල් වලට විරුද්ධ වීමට අපටද අයිතියක් ඇත. ඒ නිසා එකී පෝස්ටර් ඇතුළු සියළුම විරෝධතාවයන්ගේ අරමුණු වූයේ ආචාර්යයවරුන්ගේ අරගලයට සිසුන් වශයෙන් සහය දැක්වීම සහ හුදෙක් ශිෂ්‍ය අයිතීන් දිනා ගැනීම විනා අන් කිසිවක් නොවේ. මොරටු විශ්ව විද්‍යාලයේ ඉංජිනේරු පීඨයේ සිසුන් වශයෙන් අපට ඒ හැර අන් කිසිම චේතනාවක් නැත. කිසිදු දේශපාලන පක්ෂයක මතයක් දැරීමට ද අපට කිසිම අවශ්‍යතාවයක් නැත. ඒ අප එකී බල ලෝභී කිසිවෙකුගේ අතකොළු නොවන හෙයින් ද, පටු දේශපාලන වාසි වලට ලංකාවේ උසස්තම ඉංජිනේරුවන් බිහි කරන විශ්ව විද්‍යාලයට හෑල්ලු කිරීමට තරම් පහත් මානසිකත්වයක් අපට නැති නිසාය.
එබැවින් මොරටුව විශ්වවිද්‍යාලයේ ඉංජිනේරු පිඨය වශයෙන් මෙතෙක් අප ආ මඟ පිළිබඳව අපි සැහීමකට පත් වන්නෙමු. ඉදිරිය පැහැදිලිය. අපි එය පසුපස ස්වාධීනව ගමන් කරන්නෙමු.
ඉතිං, නංගියේ මල්ලියේ,
“මොරටුව විශ්වවිද්‍යාලයේ ඉංජිනේරු පිඨයේ ඔයාලගේ මොළවලට වස පොවන ජාතියේ කට්ටිය නෑ.අපි ඒක නිර්භයව කියනවා. මොකද කැම්පස් එකේ ගේට්ටුවෙන් ඇතුල් වෙද්දී අපි ඔලුවේ තියන පාට පක්ෂ භේද ටික එළියෙන් තියල එන්නේ. අපි සියළු දෙනාම අපගේ අනාගතය ගැන විවෘත මනසකින් ඉන්නේ .එ හින්ද අපිව කොච්චර හංවඩු ගැහුවත් ඉංජිනේරුවන් වශයෙන් අපි හරි මඟ යනවා. ඔයාලට අපි ඒක සහතික කරනවා.”
